Sardiyon ki shamon main jaisay jaisay sham se he andhaira berhta jata hay ....mera dil ghat'ta jata hay.... mujhay andhairay aur khamoshiyon se shuru se he wehshat si hoti hay.... dum ghut'ta mehsoos hota hay...per ye kaisa insaf hay ae meray Malik k jo insan jis bat say derta hay ...bachta hay tou wohi sub uska muqadar bana daita hay.... aur phir uski bebasi ka tamasha ban k reh jata hay....
Apni zaat main sabr o kana'at ki gantain (knots) laga tou li main nay per jab unko kholna chaha tou wo itni mazboot ho chuki thin k unko khola nahi ja sakta tha.....
Apnay ap say lartay ... batain kerte ab thakan si honay lagi hay... k khud apnay wajood say aik bair sa mehsoos honay laga hay...Na janay aisa kyoon ho raha hay..... Apnay ap say bhi khauf anay laga hay....
Main kitna badal gai hon..... k baz dafa khud ko bhi pehchan nahi pati.....Rooh itni pyasi ho gai hay k sairab ho k he nahi deti.... Aik Aik baat khoon rulati hay...
Is say acha tou ye tha Ae meray RAB k tera nam lay lay ker pagal ho jati ......duniya main dil laga k tou ye bechaini mazeed berh gai.... Wo qarar jo tujhko mehvar bana ker hasil hota tha wo qarar tou lut gaya .....Meray Malik ger main kisi qabil nahi duniya k tou TU apna he ker lay mujhay....Mujhay pannah day dae......meri pyasi rooh ko apni mohabat k pani say sairab ker day...meray dukhon ka madawa ker day kuch is terha k main duniya se beparwa ho jaon aur teri mohabat main mast rahon..... Tujhko khonay ka tou dharkah sa bhi nahi hota k TU tou uska bhi hota hay jo tera hona nahi chahta aur jo tera hona chahta hay TU us say ziada uska ho jata hay.....
Mohabat e Elahi main mashgool ker day meray Malik k Eman ki roshni ki barish si kerday .... aisi barish jo dil o demagh ko itna munawar kerde k sham dhalnay ka ya andhairay berhnay ka zara baraber bhi khauf dil main na rahay.... Teray saath honay ka ahsaas is qadar zehan o rooh per havi rahay k tanhai ka ahsas ho he na paye............
APna karam ker day meray Malik............Apni yaad k siwa meray dil se sub kuch mehv ker day.... Mujhay apna bana lay meray RAB k mera koi nahi hay .....Tere siwa.... Mujhay kisi se tawaqoh nahi hay .....Tere siwa.........