Soch k zaviye ka aik he rukh hay....

Meri soch k zaviye kuch bhi hon...haqeeqat sirf aik he hay...meri soch is haqeeqat ko kabhi nahi badal sakti...kabhi bhi nahi...

Ye maushra mardon ka hay... aik mard dosray ko protect kerta hay... kyoon k sub ki soch aik he hay... sub he apni badshahat ko aurat k khoon ki balli cherhatay hain...

Ye khooni log Allah k asoolon say munharif ho ker apnay alag he asool wazah kiye howay hain aur khud ko phir bhi right way per kehtay hain....kyoon k unhain ALLAH nay strong banaya hay...

Meri soch k saray zaviye aur taziye thannday hain ab.....

Bhala kon zamanay k asoolon say bagawat kerta hay...

Maan behlanay ko bas batain kerni ani chaheye...

jo ye seekh lay wo kamyab hay....

Aik TRASH BIN ki kahani...uski apni zubani...

Mujhay apnay taraf may is say ziada kuch nahi kehna k ....

Jis nay mujhay dhutkara main nay kabhi uski chokat nahi chori k meray baad uska kia hoga... Usnay phir bhi meri wuqat na jani... Us nay meri gunjaish say ziada kachra dal dia ....Main ubal para...

Phir aik meherban mila jis nay mujhay pyar say rakha ... jab dil chaha pyar say galay lagaya aur jab dil chaha daman churaya...

Mujhay tazheek mehsoos howi apni bohat ziada .... itni k main ye bhool gaya k main trash bin hon... aur meri wuqat us koray jaisi he hay jo mujh may dala jata hay...

be wuqat

be maya

trash bin...

Duniyawi saharay V/S ALLAH

Ajj Javed Chaudhary ki "Zero Point" say aik iktibas mujhay bohat acha laga....bohat he khobsurati say unhon nay aik haqeeqat ko bayan kia hay....Jo kuch is terha say hay....

".Bachpan ki mehroomiyan, bachpan ki ziad'tiyan, bachpan ki mar'ain. aur bachpan k samjhotay, hamari zaat may khaalah ban jatay hain..jo waqt guzarnay k saath saath baray hotay jatay hain...hum kabhi isko kitabon say bharnay ki koshih kertay hain, kabhi aurton say, kabhi raag'on say, kabhi tasveeron say, aur kabhi shair'on say, kabhi dolat , shohrat aur taluq e aama say ...LAIKIN YE KHAALAH KABHI NAHI BHARTAY".

Zindagi may kisi shae k kho janay ka gham tou phir bhi insan bardash ker he laita hay magar bat agar ahsasat ki ho...jazbat ki ho...ya kisi gehray gham aur khushi ki ho....yadgar hoti hay...aur ye waqt zehan k parday per sabt ho ker reh jatay hain...aur agar kabhi aisa ho bhi tou kabhi kabhi aisa bhi ho jata hay k ye batain koi bhoot ban ker hamain darati hain....uthtay bethay ....sotay jagtay, rotay hanstay, lashaur may wohi batain pas e parda raqs kerti rehti hain jin ko hum sochna nahi chahtay...jinhan hum yaad kerna nahi chahtay...jinhain may zehan ki sil say khurach khurach ker utar phenkna chahtay hain..us soch k zakhm per khurand(heal up layer) a tou jati hay per na janay kis waqt wo phir hara ho jata hay....

Kitabon ki pannah laina dekhnay aur sunnay may bari bhali lagti hay....per kyoon k isay main nay khud apnay bachpan say bartah hay tou NAHI .....Ye bhi kam nahi duniya walon say......waqt say pehlay her bat ka shaur ap ki hansi ko .. ap k bachpan ko khatum ker daita hay...wo jo guriya khailnay k din thay wo bhi in kitabon ki nazar kiye main nay...in kitabon nay he seekhaya mujhay....kaisay ??? jab dil rota ho tou bhi khud ko normal rukh ker hans ker dekhana hay...k yahan koi kisi ka nahi....apnay apnay waqt per her rishta ata hay apnay ristay ka lagaan(tax) wasool kerta hay aur chalta banta hay...

In kitabon nay meri zaat ko jahan bohat hassas banaya wahan kuch cheizon may bohat behiss bhi ker dia...Jahan dosron k liye sarapa e sila e rehmi wahin apnay khud k liye bohat ziada aziat pasand..
Mujhay nahi yaad main nay kabhi khud ko mauf kia ho...

Mujhay khud say batain kerna bohat acha lagta hay...kabhi chand ko taktay dekh ker us say batain karna...kabhi chat k aik makhsoos konay may beth ker us say dukh sukh kehna...Zindagi may koi bhi kabhi ye dawa nahi ker sakta k main nay us say apnay dil ki batain ki hon...siwai chand k ...us konay k , aur seeriyon per beth ker khud he burburanay k ...mujhay acha lagta hay ...

Mujhay kisi ki tawako jo wo mujh say kerta ho...usay pori kerna acha lagta hay...ye jantay howay bhi k is k bad durd he milna hay us shaks say...per main nay kabhi khud kisi say bhi tawako nahi rakhi...Siwai Allah k .. Per mujhay logon say mohabat hay..is liye k mujhay ALLAH say mohabat hay...

Hum zalim log hain....Allah ko bhool jatay hain ...logon may pannah dhondtay hain...tou bas phir bhataktay he rehtay hain ....safar may he rehtay hain tamam umr....mazil ka tayun he nahi ho pata ....Agaz e safar bhi hath khali hotay hain aur ikhtimam e safar bhi ....Anjam e safar maloom hota hay per phir bhi safar ko uth kharay hotay hain...

Dunyawi saharay ap ko jazbati tore per, jismani tore per had say ziada kamzoor ker daitay hain...itna kamzoor k kabhi kabhi apni zinda lash ka bojh hum khud nahi utha patay ...dhee jatay hain....
Jab k Allah ki mohabat insan ko strong banati hay...us k honay say hamain apnay kuch honay ka ahsas rehta hay ....Phir bhi hum kyoon apni khushyan dosron may dhondtay hain ..ALLAH say talab nahi kertay....
Wo tou dost hay....khair khawah hay....her jaga sath hay hamaray, sukh dukh sunta hay...phir bhi hum.........per kyooon...

Fehmida

Faisla....

Juda ho ker hazaron faislay hum nay kiye ab tak

Magar "Ik Faisla" abhi humko ba'hum bhi kerna hay

Khawab achay hon tou sonay walay ko bhaa'tay hain magar in suhanay khawabon k saharay zindagi nahi guzari ja sakti....Her shaks ki ankhon may khawab halkoray laitay hain...In khawabon ko panay k liye kuch log her mumkin koshish kertay hain aur kuch thak har ker beth bhi jatay hain....per himmat chore dainay walay aksar ye bazi haar jatay hain....

Aisa nahi hay k her shaks khawab sajata ho ..baz aisay bhi hotay hain k jo apnay ap ko in cheizon say dore he rukhtay hain ... aur wo apni zindagi k faislay apnay khooni rishton k hathon girwi rukh daitay hain k kismat meri....marzi teri....per ye kam kertay howay wo soch bhi nahi saktay k ye kia ker gai wo....aur jab hosh ata hay tou dair bohat dair ho jati hay...hath say waqt rait ki manind phisal phisal jata hay...aur akhir may hath khali honay per ahsas hota hay k ham to pehlay bhi khali hath he thay aur ab bhi RAHA kuch bhi nahi....

Zindagi ki sakhtiyan itna nahi marti insan ko ...jitna jin apnon k hath apni kismat girwi rakwa ker apnay haq may zulm kia hota hay.....unki waqt per be-rukhi ....k ye he likha tha kismat may.... Kitna zalim hay insan ... Qismat ko ilzam day ker patli gali say nikal jata hay....

Per main isko nahi manti....Ye giray howay logon ki pechan hoti hay...apni galti ko dosron per daal daina....apnay bachao k liye dosron ko daoo per laga daina...apni kisi shaksi kami ya ahsas e kamtari ko kam kernay k liye ... apnay say kamzoor ko nishana bana ker rakhna...aur nishana bhi un baton per banana jo us may hon he nahi...asal may tou ap apna aks dosron may talash kertay hain....jo kamyan ap may hoti hay wo ap dosron may dhond ker khud ki IZZAT E NAFS ko taskeen poncha rahay hotay hain...Zehni girawat is say berh ker kia hoge...???

Per aik bat hay...hum jaisay log to sotay he nahi to khawab kia dekhain gay.....pata nahi kyoon jo kam bhi kia dosron say hamaisha mukhtalif he kia.....khawab bhi dekha to wo jiski tabeer ka ilm he nahi ho sakta ...k khawab dekha bhi to ik saey ka...jis ka ata pata he nahi...jo jab dil chahay dil ki masand per betha daita hay jab chaheye nazron say gira deta hay...per ye kia pagal pan hay k kuch bura lagta he nahi ... na janay kyoon?? Ye soch lia k uski cheiz hay wo jaisa jaisay bartao karay...shikayat kaisi?

Bari say bari imarat(building) ki bunyad may choti choti e'ntain(blocks) istimal hoti hain...dekhnay may ye bazahir be-wukat e'ntain hain azeem imaraton ko mazbooti aur paidari ata kerti hain...Bazahir ye bewukat nazar anay wali e'ntain kuch nahi ...magar jab ik e'nt bhi apni jaga say hil jaye to imarat dhee jati hay....

Aisa he kuch zindagi may bhi hota hay jab tak hum kisi ki life ka hissa hotay hain...unhain hamari wukat aur ahmiat nahi hoti aur hamaray janay k bad unhain ahsas hota hay k hum kuch thay...chup thay per bolna chahtay thay bohat kuch....

chahtay thay k koi ansoo pochay...per khud roo k khud he pochna pertay thay

Chahtay thay k koi sath ho...magar sath thi to tanhai....

Chahtay thay k koi phoolon say jhooli bhar bher day...k bohat pyar hain mujhay in say..

per.......

dil bhi khali

jhooli bhi khali....

aur jo log zindagi may phoolon say apki khushi pori nahi ker saktay

unsay umeed he kia??

k wo shehr e khamoshan may akar apki aramgah per do phoolon ki pankharyan he daal jain gay...

Jo khoon k ansoo daitay hain unhain iski surkhi ka ahsas he nahi rehta...

per hona hay ahsaas ...aik din hoga zaroor

per jab ..

jab hum nahi hongay.......