Galti...

Izzat, Lehaaz, Ahtaram aur Murawat ki maari howi aurat k saath jaiz haq tak cheer chaar krain. Jaiz had matlab uski bardasht ki akhri line se tajawuz ki galti na he krain to behter hay.

Ye na ho k

In izzat lihaaz ahtaram aur murawat ko wo alfaaz ki had main rehtay howay ap ki jism k rowey k rongtay kharay ker day aur boti boti ka reesha laraz k reh jaye. Alfaaz ka zero bomb, ziatiyon k gola barood k bhi parakhchy ura sakta hy.

Kisi k nafrat k aatishdaan ki lambi lapton wali aag ko bujhaney k liye mazloom ki ankh ka aik ansoo ka qatra he bht hota hy.

Written by Fehmida Chaudhary
4th july 2020

Ae’saal’ -e- sawab...

Jis terha “Rooh” k nikal jane k bad jism kisi kaam ka nahi rehta isi liye manon mitti tallay daba dia jata hy.
Bilkul isi terha agr kisi orat k dil se uski “IZZAT” ka der nikal jaye to wo usi murday k jesi he hoti hy jis ki rooh uska jism chor chuki ho. Amomum aurat nam he “IZZAT AUR HAYA” . Izzat ka der her aurat ko he hota hy per yahan per baat us izzatdaar aurat ki horhi hy jiska fakhr aur maan uski haya aur pakeezgi uska assassa e hayat hoti hy. Aisi roohon k faislay duniya ki alooda fiza main teh nahi kiye jatay. Un cases ki sunwai ALLAH KI ADALAT may hoti hy jahan Allah he Judge hy. Wohi waqeel aur wohi gawaah. Koi deal hoti hy na he kafara ya kasaas hota hy. Kyoon k kafara galtiyon ka hota hy gunnah ki tou saza hoti hy na. Aur apnay murda jism zindagi Bhar apne he kandhon pe laad k phirney walon ko zinda tasawer krna he nhi chaheye. Kafaray zinda wajood ki ziati k ada kiye jatay hain. Maray howey wajood k liye tou AE’SAAL’ - E - SAWAB kia jata hy.

Written by Fehmida Chaudhary
4th july 2020

Kuch achi batain...

Ibadatguzar banday ka ibadat kernay pe takabur kerna bilkul aisa hy jesay kisi chez ko deemak ander he ander khaa jaye aur akhir may wo cheiz tewara k zameen bose hojaye.

Sari umr apni ibadaton k khumaar main rehnay walay jab Allah ki baargaah main hazir hotay hain tou un ki peeshani ka teeka ya hajj umron ki tadaad,  rozay ki qaboliat ya tadad ka hisaab nahi hota.

Gaur kijiyega. Taadad maani nhi rakhi. Niyat ka ajer dia jayega.

Mene ye observe kia hy k hmare yahan namaz, roza,hajj kerne walay ya kuch hifz kernay walay khud he khudko "Naik" samajh k jannat k haqdar samajh letay hain. Aur bajaye is k keh wo log ajzi ikhtiar krain aur ikhlaq ki passdari kertay howay deen ki mohabat logon k dilon main paida krain. Wo apnay app ko aala tareen musalman samajh ker dosron ki tazleel kerna shuru kr detay hain. Kufr k bad sakht tareen gunnah kisi musalman ki beizzati kerna hy. 

Meri ammi nay hmari jin khatoot pe tarbiat ki hy un main namaz rozay k ilawa b beshumar cheizain hain jin k hum Allah ko jawabdar hain. Maslan...

Kabhi kisi ka nam na bigaro ya uski zahiri shaksiat ki kisi kami ko le kar uska mazak urao ya galat nam se pukaro.

Jab kisi ka koi aeb pta chal jaye to usko dhanpoo. Allah us k badlay may tumhare aeb dhanpay ga.

Hamaisha sach bolo. Mazak main b jhoot na bolo. Jhoot ki gunjaish is sorat may hay k agr kahin nafrat prne ka imkan hy tou jhoot ka sahara lene main burai nahi . Maslan do logon main larai hy aur dono main nafrat b tou hum dosti krwane k liye ye keh dain alag alag dono ko k arey wo to tumhari bht khobiyan bayan krta hy.

Do logon ki sulah kerwane wala jannat me mehel bna leta hy.

Kisi ka aetimad kabhi na toro. Jo usne ap pe kia ho.

Jo wada kro wo pora kro.

Kisi ko jhooti umeed mat do. Bat wohi kro jo nibha sako.

Amanat me khayanat na kro. Amanat ki aik he qism nhi hoti k kuch rakhwa dia jaye aur wapis kr dia jaye mangne per. Iski iqsaam hain bohat . Jiski misaal ye b hy k Meri ami agr mohalay se koi cheiz pak k aati thi to wo plate khali nhi deti thin. Aur aglay din jab tak parosiyon ki plate ko istamal b na kernay deti k ye amanat hy hmare pass unse pochay bagair isko use krna b gunnah hy.

Ye 

Kisi ka raaz b hmaray pass amanat he hota hy. Jis main khayanat ka b gunnah hy.

Tasdeeq k bagair koi baat kerna jhooti afwa phelana bhi gunnah hy.

Batain to hazaar hain kyoon k maa hmaisha he beti ko kuch na kuch nasihaat krti rehti hain.

In baton ko share kernay ka maqsad ye b hy k in sub pe amal krna bhi utna he zaroori hy jitna farzi ibadaat zarori hy.

Written by Fehmida Chaudhary
3rd july 2020
I wish meri ye tamam batain agr Allah ko achi lg jain to unhain meray waldain aur bhai ki maghfiraat ki dua samajh k un k aala darjaat krdain aur unko pasandeeda bandon main shumar kerlain ameen sum ameen.