Mystery of life....

Ye shart hay dastak ho agar dust e yaqee'n say

Der chore k devar bhi khul jaye kahin say

Lagta hay k sach much kahin mojood hay duniya

Hum waham bhi kertay hain tou kertay hain yaqee'n say

Zindagi may kabhi kabhi insan apne aap ko ik moti ki manind seep main qaid ker laita hay k koi bhi is k dil ki baat, iska dukh durd , us k mehsoosat na jaan sakay k wo nahi chahta k uski sochon ki rajdahani main koi shareeq ho...

Phir aik waqt aisa ata hay k ik makhsoos dastak k israr per ap derwazay k kawaar khool detay ho per shayad aisa ker k aap apnay liye aik nai aziat ka der khool daitay ho...aur wo jo kabhi aik sakoon ka ik lamha muyasar ata tha wo bhi kho daitay ho....kyoon k darwazay ko choo ker guzarnay wali hawa bhi apko hirasaan sa ker daiti hay...

Kahin perha tha k apnay aap ko aam ker dainay walay log bohat jald faramosh ker diye jatay hain.....Ik sachai hay ye bhi....

Asaani si milnay wali chiez ki hamaray yahan qader hoti he nahi hay...isi insani fitrat ki badolat kabhi kabhi hum hiray ki beqadri ker diatay hain..aur kabhi mitti ko sona samajh ker mehfooz kernay ki koshish kertay hain...aur hamain ahsaas tak nahi hota..k hamari is beqadri nay heeeray ki chamak ko maand ker dia hay aur jis mitti ko hum nay sona samjha tha uski chemistry tou wohi rahi....mittti ki mitti....

Zindagi ki khawahishain kabhi samajh main aye he nahi k jo iski bheek mangta hay wo khali hath aur jo is say mutnafir hota hay ye us k sath saye ki terha chimat jati hay... Wafa iski fitrat main hay he nahi ... ye to bas siskati hay...tarpati hay ... rulati hay... her atay lamhon main ik naya zakhm aik nai choat day jati hay... Bari Zalim hay ye ... kehnay ko zindagi hamari hay aur hum isko guzarnay k paband hain jab tak sansoon ka safar hay ana jana hay... per haqeeqat to kuch aur he hoti hay .... Zindagi hamain guzar rahi hoti hay...aur is baat ka idrak hamain us waqt hota hay jab zindagi ki bachi khuchi sansain hoti hain hamaray pass...

Zalim kahin ki...

Khud ko apna he aasra na raha........

Ajj demagh aisay munjamind sa hay k lagta hay k tamam hissyat baraf ban gai hain... koi mausam koi khushboo koi ahsaas is baraf ko pighla he nahi pa raha....

Khud ko khud ka aasra bhi na raha........aisay waqt ka kabhi socha he na tha..

Zindagi k sehra may ja baja andhiyon nay ....

Waqt k berehem shikanjon ki kharashon nay...

Pay der pay zakhom nay...

Dard k jazeeron nay ...

mera kuch na bigara.....

Aur mohabat ki waqfay waqfay say barasti bondhon nay meri rooh may jo shigaff dal diye hain ..wo bhar nahi parahay...

Meri zaat ka akailapan ab khokhalay pan may tabdeel hota jaraha hay.....mujhay andaza nahi.... meri rooh kidhar hai aur main kidhar......

Manzil ki talash main main bhatak rahi hon........kabhi idher kabhi udhar ........na rehbar ka pata ....na masiha k nam tak ka pata ..........k kis nam say pukaro ........jab usko pukarna ho.......kahan dhondon jab usay talashna ho............kahan dhondhon...........kidhar jaon..........

Rait k gharonday girata chala gaya...

Maa aik aisi hasti jo bachpan say apni aulad ki tarbiat kerti ati hay...Hamari society may larkiyon per ziada tawajoo di jati hay...balkay youn kaha jaye k ziada tawajoo di jati THI tou ziada behtar hoga....ajj kal tou maa'ain bhi TIT FOR TAT wali tarbiat deti hain bajay is bat ko samjhanay k k sabr aur bardash may he aurat ki azmat hay...aisa nahi hay k is bardash k chakkar may apnay apko he aurat fanna ker dalay magar ALLAH nay ye husn aurat ki fitrat may he rukha hay k wo sabr aur bardast say kam lay...had say tajawuz to kisi bhi maumlay may behtar nahi rehta..aisa he is case may he hona chaheye...

Bachpan ik bat aksar yaad ati hay...hum bachpan may mitti k gharonday bana ker khailtay hain...kabhi unhain bhai shararat may dha daitay hain ya kabhi koi dost shararat may aker gira jata hay wo mitti ka gharonda...maa say shikayat kernay per ye he sunnay ko milta hay k dobara bana lo...koi bat nahi....

Per ye bat aksar meray dil may ...meray zehan may gardish kerti hay k mitti k gharonday to ik bar deh k ban jatay hain ...per un gharon k kia jin ki mazboot dewarain tou hoti hay per un k makeen aik aisi nafrat ki faseel tameer ker k apnay ko us may mehsoor ker laitay hain k na he andar anay k rastay ka pata daitay hian na he kisi ko ander anay ki ijazat ....unki ana unko her shae say pyari hoti hay....jisko wo aik tamgae ki manind mathay ki lakeeron may izafa ker k apnay sath liye phirtay hain ... AIsay jaisay k wo zameeni Khuda hon...

Aziat ka mukam hota hoga...jab ghar ki chardiwaari tou mazboot ho per ghar k makeenon may riston k beech aik aisi faseel khari ho jo nakabil e taskheer ho....

Kia ye Khuda ki khudai ko lalkarnay wali bat nahi ... kia ye firrooniat may indiraj kernay wali bat nahi...kia ye kufr nahi ALLAH ki naimaton say...Kia he khud apnay liye kharidi gai badnaseebi nahi....

Kash koi Emaan ki aisi aandhi aye jo in faseelon ko .... in nakabil e taskheer dewaron ko dha k guzarti chali jaye....aur pyar ki phuwar yahan dil k viran sunsan sehra may koi pyar ka phool khila day....Garaj baras k he sahi per sawan aye tou sahi...dil ki dharti per jammi gard ko dhoo he dalay.....k dhundlay manzar kuch nikhar he jain.....Allah chahay tou kia nahi ho sakta....

Thats why I ♥ u ALLAH mian....:)

Fehmida

Moam ki GURIYA ...

Jab main baat bay baat...bilawajah he kehkahay lagati hon...muskurati hon... tou in din'on mujhay khud he...khud say bohat der lagnay lagta hay...

Ye kehkahon k jhakkar bilawajah nahi chaltay...meray ander kahin Tofan ki aahat ka pata detay hain...Aur mujhay in tofano'on ko apni taraf berhta dekh ker zindagi say mazeed wehshat si honay lagti hay...

In waqt be-waqt anay walay TORNIDOS nay meri zaat may jo khalah aur jo darar'ain dali hain ...wo bharnay ki koshish may main nay apnay app ko bhi mitta dala hay...Magar...Ye khalah hain k bharnay may he nahi atay.... balkay in may izafa he hota jaraha hay...

Moam ki guriya dekhnay wali .....agar...aahoney foladi aasab na rakhti tou kab ka pighal ker zindagi k tofan may beh gai hoti...

Kehnay ko sinf e nazuk hay aur hosla chatan'on ka

Samajna na kabhi bint e hawa ko tum MOAM KI GURIYA

Just....toti photi be ant sochain .....

By Fehmida Ishtiaq.....

Rishton k laagan (tax)...

Bachpan say burhapay tak hum mukhtalif nauyat k rishton say juray hotay hain...

kyon k her insan ki soch..behaviour ... shakal adat aur atwar dosray say mukhtalif hotay hian isliye un may zehni hamangi nahi pai ja sakti...

Dekha jaye tou her insan dosray ko sirf us waqt tak samajhta hay jab tak wo khud usko samajhna chahay....warna wo lakh ap k sir patukhnay per ...ap ki minatain kernay per apki bat ko samajhnay k liye tayar hona he nahi hota...aur dawa hota hay apko samajhnay ka ...per kehnay aur kernay may hamaisha he farq hota hay..insan to insan he hay na..

Zindagi ki dagar per chalna itna asan nahi jitna asan lagta hay...apnay apnay zaati mafadat k liye log humse mohabaton k dhong rachatay hain aur jab tak un ki mafadad hamari zaat say wabasta hotay hain wo hamaray sath hotay hain aur jab unhain hum may apna koi faida nazar nahi ata wo chornay may dair nahi lagatay....

Ap k purkhuloos honay ko log apki kam himmati aur kamzori samjhain to dukh hota hay....

Ap k darguzar kernay ko log apki kamzori janain tou dukh hota hay...

Zindagi may rawaiye bohat ahmiat k hamil hain...

Jab rawaiye achay nahi rehtay tou dilon may ahtaram khatum ho jata hay...aur jab ahtaram khatum ho jaye tou baqi kuch nahi rehta...

Zindagi may jo log apnay galat faislon ya baton per datay rahain wo bahaduron ki sif may kharay hotay hain aur jo becharay in rishton k liye purkhuloos hotay hian...tan man dhan laga daitay hain wo kamzor tehertay hain dosron ki nazron may....aur ye kamzor dil purkhuloos log sari umr RISHTON K LAGAAN he ada kertay rehtay hain...bina kisi exemption k ...bina kisi expectation k .....bas achay pay acha kiye he jatay hain...k unhain tou sirf apna farz pora kernay say garz hoti hay....k wo ristay he kia jin ki mohabat may garz shamil ho.....

In rishton k lagan ki koi receipt koi evidence nahi hota per apna zameer EYE WITNESS hota hay....per koi amal reward k liye karain na karain ALLAH ki khoshnoodi k liye zaroor karain k wo jaza dainay wala hay....

ALLAH tallah hamain apni pannah may rakhay ameen sum ameen

Written by Fehmida Ishtiaq

TU nay to chore dia mujhko TAMASHA ker k .....

Kehtay hain k mohabat wo jazba hay jisko sirf mehsoos kia ja sakta hay isay alfaz may samjhana ya bayan ker taqreeban namumkin he hay...Iski paimaish ka koi aala (meter) nahi jis say is ki paimaish ki ja sakay..ye hay to hay...nahi hay to nahi hay...

Kehtay hain mohabat insan ko apnay mehboob k baray may possessive bana daiti hay...k usko koi dosra na dekhay...yahan tak k jo hawa choo ker guzar jaye us say bhi gillah ho jata hay chahnay walay ko....per shayad ye sab kitabi batain hain jinka haqeeqi zindagi say laina daina hota he nahi...

Mehboob koi showcase may rakha howa decoration piece nahi hota k jiski numaish ker k apnay intikhab ki daad wasool ki jaye logon say..

Per kehtay hain na k jaisay dekhnay may adaton may log aik dosray say mukhtalif hotay hain waisay he sochain bhi aik dosray say match nahi kerti...

Mohabbat Me Dil Ka Tamasha Dekha Nahi Jaata

Koi Tuta Hua Sheesha Joda Nahi Jaata

Lutade Apni Saari Khushiya Usper

Rootha Hua Chehra Uska Mujhse Dekha Nahi Jaata