Ahsaas mar gaye saaray....

Suna tha aasman pay chand nikla tha....

Suna tha Eid aye thi....

Suna tha rang barangay anchal lehraey thay...

Suna tha rang hatheli pay mehndi ka gehra tha...

Suna hay hathon aur balon main motiye k gajray khusboo phelatay thay....

Manzar badalta hay....

Kahin aik andhairay kamray main...

wo aik bebas, bekas si Larki...

zindagi k imtihan main...

jo nakam tehri thi....

Apnay ansoonon se takye ko 

bhigonay main mashghool c larki...

Tha rang zard uska

Ankhon main halkay paray thay....

Hansi ki oat main uski

Ghamon ki daastan rakam thi....

Wo band kamray main bethi

na janay kyoon...???

Kisi roshni k intizar main 

kai saalon say so nahi pai....

Wo rona chahti tou hay...

Per ro nahi pai....

Usko yaqeen nahi ab

Kisi mojzay ka zalim........

Wo raah tak rahi hay.....

Farishtaah e ajal ka.....

Wo muntazir ankhain ab benoor ho chuki hain....

Wo khawahishon k phool kab k murjha chukay hain....

Wo tamanaon k sagar dum kab k tor chukay hain....

Wo zindagi say bherpore Larki

Zindagi say kab ki....

Dor ho chuki hay....

Fehmida Chaudhary

23rd August 2012 

Zindagi....ik bala.......

Main bethay bethay na janay kia sochnay lagi k ZINDAGI akhir hay kia bala.....Kabhi meherban si lagti hay ..us maa ki terha jo chotay bachay ko hath paker ker chalna seekhaati hay...kabhi itni shafeeq k girnay ko hotay hain per hath than k sambhal laiti hay...Kabhi itni zalim k naraz ho ker dore kharay ho ker hamain girtay dekhti hay aur hamain koi rond  bhi jaye tou bhi ye tus say mas nahi hoti....dohray roop hain iskay.....kyoon kerti hay ye aisa hamaray sath....rang kyoon badalti hay....dhab kyoon badalti hay....kabhi meherban aur kabhi ajnabi....kabhi hamdard aur kabhi laparwa......Zalim kahin ki......bewafa bhi ho jati hay....jab dil chahey tou....Wafa tou ye kisi say bhi nahi kerti.....

Hum zindagi k baray main mukhtalif tujziye kertay rehtay hain aur ye bhool jatay hain k asal main zindagi hamara tajzia ker rahi hoti hay....

Mehez apnay liye jeena tou zindagi nahi hoti....Log kehtay hain k sirf apnay liye jeenay wala aur sirf apnay baray main sochnay wala tanha reh jata hay...aur uska dil sunsan bayan ho jata hay....per zindagi main is ka tajarba kia tou maloom howa kitabi batain duniya ki haqeeqaton say mukamal tor pe alag hoti hain....

Shehr e Khamoshan.......

Shehr e khamoshan akhri aram gah........jahan na koi chota na bara.....na koi ameer na gareeb...na ghamon ka mara...na khushyon ka karobar.....na haar....na singhar...sub he kuch bekar.........sub kuch.......

Aik shehr e khamoshan mere dil k ander........
jahan dafan kiye main nay saray rishtay
hon yahan k hon paar saath samander........

Behroopye......

Suno........!!!

Tum mard zaat ho...tumko sab jaiz hay...sach ko jhoot...jhoot ko sach....galat ko sahi...sahi ko galat...din ko raat...raat ko din..tum jo kaho bas waisa hay....tum jitnay rang badlo........tumko jaiz hay...dosra badlay tou girgit hay....tum chori karo ...tou jaiz hay.....Dosra karay tou gunahgar hay....Tum behroop badlo aur bat bat pay jhoot bolo...tumko jaiz hay...tum mard hona .....tumko sab jaiz hay....tum bilawajah jhoot k anbar laga do tou jaiz hay....dosra apni dastan e ghum ko chupanay ki khatir bolay wo jhoota ....

Tum her jaga fateh e aalam tehray........main nay mana.......

Per ye tou bata do ....Kis nam say pukaron ......? Kia nam hay tumhara.....?

Bhais badal badal ker nam badal badal ker jo insan khud apnay ap say dhaga karay kia wo sacha hay....Tum to apnay nahi ho.....tum aur kabhi kisi k hogay........Nahi.......Kabhi nahi.........

Mera apna nam tou hay.....main achi hon k buri ......mujhay garz nahi....per  main kisi ko kuch kehnay ka haq bhi nahi rakhti k abhi tou main khud khamiyon say muberaah nahi hon...main kisi ko kia kahonge....

Jab aik hiran(deer) apnay jhund say alag hojata hay na tou wo heran paraishan idher udher dekhta hay....shikar kernay walay us per qayamat ki nazar rakhtay hain....aur wo in shikariyon say bachnay k liye idher udher bhagti phirti hay....per uski qismat anjanay main aik aisa shikari us pay ghaat laga k betha hota hay k wo ghayal ho he jati hay...majbori ki mari...paraishan haal hirni....jaan de bethti hay......Jaan ganwa bethti hay....

Fehmida Chaudhary

8th August 2012

Beaetibari nay he bebas kia mujhay.....

Haan...mujh main he kuch kami hay.....k main kisi ko bhi apna nahi bana pati...per main khud ko is duniya k jangle main daswa daswa k thuk gai hon...ab meri rooh tak zeher phail chuka hay...jis ka koi tiryak he nahi...Main bebas hon...Main is beaetibari k hathon bohat bebas hon....

Main jis rang ko bhi hath lagaon wo kacha hota hay....jab tak cherha rehta hay jab tak hath dhoo na lon...phir rangat he zayal ho jati hay iski......

Is beaetibari nay mujhay aur kuch dia ho na dia ho AIK AETIBAR to dia he hay....ye aetibar k ab koi mujhay mazeed tabah nahi ker sakay ga...Haan bas aik ye he aetibar k like bat hay aur kuch nahi....

Fehmida Chaudhary

08th August 2012

Akhri Paraa'o ......

Ajj k nafsanafsi k dor main hum jahan apnay sakhafati ikdar ko bhool bethay hain wahan mazhab ki lailmi nay hamain sahi simt ka tayun kernay say mehroom rakha howa hay....

Hum aik aam insan hain...khattah kerna hamari fitrat main shamil hay...kabhi jantay bojhtay howay kertay hain aur kabhi laa'shauri tor per khattah sirzurd ho jati hay...aur kabhi halaat o waqiyat is k zimmay dar hotay hain ...Achay aur buray doston ki sohbat say bhi bohat farq parta hay...Hamaray mazhab main isiliye hamain rozmarah k kamon ko anjam denay k liye misaalon say, hawalon say,  waqiyat say acha bura samajhnay ki talkeen ki gai hay...Quran aik behter zerya hay zindagi guzarnay k saleeqay  seekhany k liye aur her maslay ka hul aur raah numai is main di gaye hay...

Islam main faqat Shirk kerna aisa gunnah hay jis ki maufi nahi hay...Wagerna degar tamam gunnahon k liye ye wazahat bayan ki gai hay k agaer kisi shaks k gunnah aisay hain jis ki maufi nahi hay aur us k nama e amal main aisay naik amal bhi mojood hon jo k ALLAH tallah ko mehboob hon tou Allah tallah apnay karam ki wajah say buray amal ko naik amal main tabdeel  ker dain gay....INSHALLAH...

Hamari achai aur burai dono ka sillah sirf aur sirf Allah k hath main hay...Jab Allah Tallah nay apnay mehboob RASOOL PAK s.w.t ko ye haq nahi dia k wo kisi ko us k amal ki jaza aur saza akhrat main day sakain  tou hum sub tou  un k Qadmon ki khaak bhi nahi....

Roz e akhrat  main Mehboob e Khuda Hazrat Muhammad (Ap per salamti ho) momino ki musalmano ki maufi ki guzarish karain gay...sifarish karain gay....Aur gaur karain k Is guzarish ko manna na manna ALLAH k ikhtiar main hay aur bas.....

Hum aur aap roz mara zindagi main kitnay klogon ko ye bat kehtay howay paye jatay hain k falan ko Allah dikha raha hay.....Us k aamal ki saaza hay...Uska bura kia samnay araha hay....
Ye nadani nahi hay
Balkay
GUNNAH hay aisa kehna.....

Kisi ka ahtasab ker k ap Allah tallah k kam ko apnay hathon main lay ker apn gunnah tou ker he rahay hotay hain saath he saath apki sab naikiyan us shaks k (jisko ap bura keh rahay hotay ho) k nama' e amal main transfer ho rahi hoti hain...Asal main tou hum aisa ker k apnay sath bura aur us shaks k sath acha ker rahay hotay hain.....

Bura kam kerna itna bura nahi hay...Jitna bura kam ker k sharminda na hona.....APnay gunnah ko chota samajhna aur dosray k gunnah ko bara samajhna sub say bara aur na'qabil'e maufi gunnah hay....Bakhshish Allah k haath main hay aur ye bhi k wo kisko mauf karay aur kisko mauf na karay....USKI MARZI....bas

Hamain hamaisha mazhab ki sakhtiyon ko lay ker daraya jata hay jiski wajah say mazhab say mohabat main khalul ajata hay....Ye mazhab ka maumla bhi aisa he hay k jaisa k aik dukandar apni kisi baichnay wali cheiz ki sifaat bayan kerta hay ...Nuqs nahi bayan kerta....Isi terha Maulvi hazrat nay mazhab ko "haw'wa" bana ker  paish kia howa hay...Dozak aur Aag k topic say he bahar nahi atay....aur agar nikal bhi jain tou bat HOORON per aker khatum ho jati hay....Kia Hooron k ilawa ALLAH nay naik achay kamon per  koi aur inam nahi rakha howa....Nafs ki taskeen walay saray inamat yaad rehtay hain mard hazrat ko....khawah maulvi ho k aam banda......:-)

Mazhab main choti choti naikiyon k silay aur jaza ka zikkr ker k mazhab say pyar ki tergheeb di ja sakti hay...Mukamal tou kisi ki bhi zaat nahi ..Siwaye RAB ki zaat k ......

Apnay kiye gai gunnah per sharminda hona is bat ki daleel hay k hamara RAB humse na umeed nahi hay  aur USKI rehmat ka saya hum per abhi bhi qaim hay...k....Allah tauba ki taufeeq bhi sirf aur sirf usi ko deta hay jisay ALLAH chahay...Aur jisay Allah mehboob rakhta hay....

Jab k dosri taraf jo gunnah ker k bhi ppashaiman nahi hotay...Un k dilon pay ALLAH nay tallay dal rakhay hain...Kyoon k ....Allah un se itna naraz hota hay k wo inki tauba sun'nay ka bhi rawa'dar nahi hota....

Gunnahon pay sharminda hona ALLAH ka us shaks ki zaat per meherban honay ki ilamat hay...Aur kia chaheye insan ko ....Allah khush  aur meherban ho tou DO JAHAN AP K QADMON MAIN .....Zindagi aur aakbat dono he sanwar jaye ge ....IN SHA ALLAH

Main bhi zindagi k safar say thak gai hon baarha socha aur sach kahon tou koshishain bhi ki k is na'murad zindagi say kisi tor chutkara hasil kerlon....per ....Zindagi k her mor ki terha is mukam  per bhi naa'kam naa'murad aur naa'shaad he rahi......Hamaisha ki terha....

Mujhay is zindagi main do logon nay dhoka dia....Mera aetimad logon per say aur shayad khud say bhi uth sa gaya....
Aik wo log thay jo meray apnay thay
Aur
Dosray wo logo thay jo meray apnay nahi thay per main nay unko apna mana...apna jana...apna ap luta dia un sub per....

Per aetimad ya aetibar to kia he baa'haal hona tha...Ab ye aalam hay k kis per bharosa kernay wala OPTION meri zindagi say Permanently delete hogaya hay......

Main nay RAB say kuch ziada tou nahi manga tha ..sirf...Aik khawahish thi k meray bad koi aik tou ho jo meri yaad main roye....Meri kami mehsoos karay....Meray kaandhon say wo bojh utar day jo main main Laday laday thak chuki hon...Nidhaal ho chuki hon....

Magar nahi.....
Main yahan bhi nakamyab tehri.......Hamaisha ki terha........Aaah

Ae meri zindgi k malik meray ALLAH main nay teri raah per paraoo daala hay....mujhay apna bana laina...aur kuch day na day bas mujh se ye "HISS E DUNIYA" chein lay ...Main yahan sub kuch haar bethi hon....Dosray jahan main mujhay wo sub chaheye....Aur meray malik TU tou amanat main khayanat nahi kerta na....Tou meri amanat teray supurd ..........Maula.... mujhay mayoos na kerna .....Mujhay mayooos na kerna .....

Mujhay koi wada .....koi tamheed nahi chaheye .....
Bas.....Tera Saath
Bas.....Teri nigah e karam
Bas.....Teri rehmat
Bas....Sirf TU chaheye ........

Mere Maula yehi mera akhri paraoo hay.....mujhay sambhal laina....Ameen

Fehmida Chaudhary....
7th August 2012

  

Mera Taaruf....

Log mujhse mera taaruf pochtay hain ... wo pochtay hain k main kon hon...Main unko kis terha bataon k main kon hon..kyoon k main tou kuch hon he nahi...honay aur na honay k darmiyan hay meri zaat...koi shanakht hay he nahi....koi pata hay he nahi...

Main logon ko kis terha bata sakti hon k main wo zinda lash hon jis k armanon nay kafan ka safaid jora pehna hay....jis k khawab andhairay koo'ain main khudkashi ker chukay hain...Jiski tamanain lab per anay say pehlay he dam tore chuki hain....Main kis terha bataon unko....kis terha...?

Meri soch mera saath denay say he munkir ho jati hay jab likhna chahon k main kia hon...Apni zaat k khander main khud he do char cheikhain mar k wapis ajati hon k MAIN KON HON???

KON HON MAIN............???

Taa'ruf....

My own nazam....

Loag mujh say mera taa'ruf pochtay hain...

Main unko kis terha bataon???

K

Main wo zinda lash hon

Jis k khawabon nay kafan ka safaid jora pehna hay

Jis k chehray pay udasiyon k dairay hain

Aur

Jahan hijr ka ik azdaham

Meri rooh say khamoshi ka anchal

utha ker meray chehray ka dedar kerta hay

Aur

Phir ma'no mitti talay ja sota hay...

Meray jism k qabristan say

aah o baqa

Siskariyon

aur

cheek o pukar ki awazain ati rehti hain...

Is aag may main roz jalti

Roz marti hon...

K

mujhay arman rehta hay k

is zinda janazay ko

Koi jhooti tasalli

Koi jhoota sahara

Koi hamdardi ka utha hath hi sahi....

Ik phuwar ban ker

Is jalti undekhi mayoosi

Aur

Udasi ki aag ko thanda ker day...

K

Meri rooh ko mitti may milker he sahi kuch sakoon tou milay.....

http://www.youtube.com/watch?v=aCH0y8cfPY8

Fehmida Chaudhary....

06th August 2012

Aurat aur Sabr.....

Aurat jis may Rab nay bardash aur sabr ka madah her aik say ziada rakha hay..Bazahir nazuk nazar anay wali ye sinf e nazuk derhaqiqat bohat bahadur hoti hay...Karay say karay imtihan main apnay apko mazboot bana ker her had se guzar jati hay...per kisi ko nahi maloom hota k ye bazahir bahadur nazar anay wali....ander say kitni darpook aur kamzoor hay...

Hamaray mazhab Islam nay aurat ko jo rutba dia hay wo kisi mazhab main nahi .... per ye society k thaikaidar Mazhab ki aar main aurat ka ahtisaal kertay nahi thaktay...

Jab aurat sabr aur bardast ki tamam manzilain teh ker lay aur phir usko chup lag jaye tou uska matalab hay k wo thak zaroor gai hay magar apnay RAB per us nay maumla chore dia hay...aur wo RAB tou munsif hay aur insaf kernay wala hay...Kisi bhi aurat ki khamoshi k peechay kia kurb palta hay ye koi aurat he jan sakti hay....Ye khamoshi aik aisa jazeera hota hay jahan roz atish fishan phattay hain....laway ubaltay hain magar samander jaisa zarf rakhnay wali wo sinf e nazuk wo sub apnay seenay main in subko khamoshi se dafan ker laiti hay...aur uski khamoshi main palnay walay taufan ka kisi ko us waqt tak andaza nahi hota jab tak wo khud isay afshan na kerday...

Aurat ki aaah (7 asman) saton asman cheer ker Rab ul izzat ki bargah main sharf e maqboliat hasil kerti hay...Aurat ko kamzoor samajh ker un k saath khailnay walay log khud mard kehelwanay k like nahi hotay...kyoon k apnay say kamzor say ana ki jang larna kisi moatabir mard ka kam hay he nahi...balkay wo to aurton se bhi gai guzray ho jatay hain...

Aurat ko khilona samanjhnay walay pori zindagi rotay he rehtay hain....aur ye silsila unki sath(7) pushton tak chalta hay aur chalta he jata hay...Aur ye he un mardon k liye aik sabak hay ...aik naseehat hay...Ye wo amal hay k jiski koi maufi nahi...koi talafi nahi...


Fehmida Chaudhary
06th August 2012

Mera Ishq .........Mera Khaliq e Kainat.....

Aisa nahi tha k zindagi k kisi lamhay apnay paida kernay walay ko bhooli hon main....Mujhay shuru say he der lagta tha ... k meri zaat se kisi ko agar faida na bhi ponchay tou nukhsan bhi na ponchay...Meri her mumkin koshish hoti k meri zaat se kisi ko koi takleef na ho...ranj na ho...main kabhi kisi k liye bura na sochon...her mumkin kam aon...Main logon ko khush kernay main lagi rahi...aur apna ap bhool gaye...Pata nahi kyoon shuru se he meray sath aisa kyoon hay k main sub ka khayal tou ker laiti hon per apna khayal rakhwana aya he nahi....Aisa nahi k kabhi mujhay sadma nahi howa kisi bat ka ...per main akser ye socha kerti k jo bin kahay hamara khayal na rakahin hum bol ker apnay alfaz ya man kyoon gunwa'ain...Zindagi k roz o shab guzartay chalay gaye aur hasil o hasool ka shumar na bhi kia jaye to apni bekadri zar zar rula deti thi...
Log tab tak hamaray hotay hain jab tak hamari zaat un k liye kisi faiday ka mazhar hoti hay...nazar k samnay say gaye nahi k TU kon ya Main kon...??

Ranj hota tha per ab nahi hota...

Duniya tou azma dekhi thi...
Phir Us ki pannah ki taraf bhagi jis say kabhi dor to nahi howi thi...per shayad wo shiddat nahi rahi thi jab he bhatak rahi thi galiyon galiyon...
Us nay mujh se na meri kam hazri k baray main sawal kiye na he mujhay apni pannah say nikal janay ko kaha....na he kis bat ka jawaz aur jawab manga....us nay apni rehmat k halay main mujhay lapait liya....ik shafeeq Maa ki terha .... us k pass mujhay wo sub mila jiski talash main her shaks main kerti arahi thi....khaloos pyar .....wo bin mangay deta he gaya .....na koi demand thi uski mujh se na he kisi kism ki expectation.....

Main nidamat se roti rahi ....roti rahi ......roti rahi....
aur wo mujhay pyar se dilasay deta chala gaya....
Apnay noor k halay main us nay mujhay dakhil kerlia....

Main sahi jaga ponchi thi....
ye he meri manzil thi...
ye he mera hasil....

Mera ALLAH ..... Mera RAB.... Mera Munsif.....Mera Khaliq.....
us nay mujhay samait lia.....us wajood ko jo bikhar chuka tha....kuch tukray idher thay tou kuch udher .... zakhmi laho lohan chalni jiger....sub theek hogaya uski masihai say....her kanta ab phool lagta tha...us nay sub zakhm bhar diye mujhay....meri bekarariyon ko sakoon dia usne...uski kin kin naimaton ka shukar ada karon...

Mujhay Allah se pyar tou tha thi ab mujhay ishq hogaya .......Janoon ki had tak.....main isi janoon main mubtila ho ker uski mohabat k samander main dob jana chahti hon...main kisi mazar ka majawar nahi banna chhati mujhay us k darbar ki gadai kafi hay.......mujhay mera ishq milgaqya....mera RAB....Mera Ishq....Aur yehi ishq e haqiqi he tou bas haqiqat hay baqi sub sarab hay.....bhanwar hay....


Fehmida Chaudhary
3rd August 2012