Be rabt si batain.......

Maine zindagi main wo dukh bhi uthaye jo kabhi soche bhi na thay... Apnay hissay k dukh ki to baat alag hay...maine dosron k dukh bhi uthaye hain... mujhay nahi maloom mene aisa kyoon kia per mujhay ye maloom hay k meri bari ane per un sb k chehron se nakab uter gaye....jinhon ne apnay dukh mujhay daan kiye thay .... 

Intizaar mout jesa hota hay...aisa suna tha....per ye us jaisa nahi...ye mout he hay...

aur ab mout k daahanay per khari main....mayoosi se daldal main dhans chuki hon...mujhay lafazi se chir hay....mujhay alfaz moam nahi kerte...main kabhi bhi priority nahi rahi...mujhay jhoot se ...jhoote wadon se chir hay....aise log mere dil se uter jate hain...

dil se uter jane main AUR dil se nikal jane main farq hota hay....bohat bara farq....

dil se uter janay wala dil se nikal bhi jata hay....aisa zaroori nahi....dil me basne wale aasaib ki terha hote hain...chimat k he reh jate hain ...dil k sath...zindagi k saath...

Maine ye dekha hay k paisa itni bari taqat hay k insan dosre no per rehta hay... shayad duniya k bazaar me insan bhi bikta hay.... per wo kehta nahi hay....k wo bikao hay....

Mujhay yaad hay aik dafa usne bhi bola tha ...k main ghattay ka sauda nahi kerta....aur nuqsan jisme ho wo kam main nahi kerta....

Mujh pagli ko dekho...her choti choti cheiz yaad rakhne wali...ye baat bhool bethi thi....

Mujhy is dukh se nibatne main kai saal lag gaye.... sirf ye baat samajhne main kai saal lag gaye...

mujhay marne ko na auzaar darkar hay koi...na aah o zaar he zarori hay...

yehi dosra darja dena he kafi hay .... main khud he mar jaongi...

Fehmida Chaudhary

31 july 2016

Zindagi....

Janay zindagi hay k koi tawaifzadi hay....? ithlati hay ....itrati hay...naz dekhati hay apni taraf bulati hay.... aur phir jab dil bher jaye  to ruth bhi jati hay....

Fehmida Chaudhary

31/july /2016

Laikin mera dil....,era dil...

Main apko hans hans k dekhaon tou.....

Chup chup k roo roo k ankhain sujhaon tou....

Chup rahon aur kuch bhi na kahon....

mehsoos kerwaon se mujhay kisi chez se farq nahi parta....

Koi dil dukhaye ya rulaye....

Mujhay kuch nahi hota....

Main sub mehsoos ker k bhi zahir ye kerti hon

K

Main behiss si bandi hun....

Laikin Mera dil...

Mera dil

Zaar zaar rota hay....
Baar Baar rota hay....

Written by Fehmida Chaudhary

27 july 2016

Mera ghum he akhir meray kaam ayaa....

Kitna pareshan thi na main is se chutkaray k liye ...ye ghum bojh thay meray lilye ... Aur main kitna bechain thi k ye ghum kab meri jaan chorain gay....Bohat bezaar ho gai thi main ....Aur phir jab sub ne saath chore dia tou........

Wohi ghum jo bojh lagte thay mujhay .... Aik aik ker k tasalli detay rahay....

Her ghum ne mujhay samjhaya k jab aik aik ker k sub saath chore gaye to aik aik ker k her ghum bhi mit jaye ga....Kabhi na kabhi....per aisa hoga zaroor.....

Ye duniya faani hay....yahan mustaqil koi chez nahi ....na khushi ....na ghum....na humsafar na humdum...Jinko hum sahara samajhte hain .....wohi hamain besahara ker daite hain.....Aur jise hum chutkara hasil kerna chahte hain tou wohi jism ko ...jaan ko sahara de jate hain.....

Ye ghum bhi bohat ghum'khawar hain meray.....

keh....

Mera ghum he akhir mere kaam aya....

Meray ghum jisne bhi bante hon kabhi.....

Wo aye aur amanat meri, wapis kerde....

(FC)

Written by Fehmida Chaudhary

27th july 2016

Na junoon raha na PARI rahi.....

Usey rangon se pyar tha gehray shoakh rangon se ... phool chahe wo konsay bhi hon us k dil ko bohat bhataay thay....hathon me motiyon k gajray pehnay ki khawish bhi rakhti thi....shairi perhna aur likhnay ka bhi chaghaaf rakhti thi....tanhai se khauf khati thi...andhera usay khaufzada ker daita tha.... titliyon k pechay bhaga kerti thi wo bachpan main... per kabhi unhain pakernay ki jurat nahi ki us ne .... usay in titliyon ka urna  pasand tha....azad idher se udher rangeen phirti titliyan .....Baaz dafa aisa bhi hota wo ankhain mond ker khud ko titli samajhti aur khuli hawa main uraan bhar ker khud ko mehzooz kerti ....

Ajab he pagal pan k shauq thay us k.... usay ghar bananay aur sajane ka shauq tha.... bachpan main jab mitti k gharonday banati aur wo toot jatay to wo roya kerti ... us k ghar ki kachi mitti ki kiyariyan aj bhi usko yaad dilati .... wo chotay chotay chozay jo maa se zid ker k bachpan me wo lia kerti thi .... rooi k galon ki terha k pyare pyare murgi k bachay ....per pata nahi kyoon wo mar jatay thay kuch he din main...wo qabrain jin me unko dafan kia tha usne bachpan main...ajj bhi wo jagahain yaad thi usain ...wo pichi taraf kayari main nariyaal k paire k neechay ..peelay rang ka choza dafan tha...pata nahi kitnay mahino tak bakaidgi se us per lawn se phool le ker cherhati thi wo.....ghar k front lawn me wo shocking pink color ka choza .....pyara sa....bohat choo choo kerta tha wo ....ami kehti thin bilkul meri terha.....ha ha ha ....

Usay yaad tha k aik ka nam usne chunu rakha tha aur dosre ka munnu....

Chunnu ki choo choo to us k marne k baad bnd ho gai thi....per jis din wo maari thi na to us ki qabr bani na he kisi ne phool cherhaye ....na koi roya tha usay......us ki awaz us me he dafan ho gai thi.....kia ye khula tazaad nahi....k wo jeete ji mari thi to uski choo choo band hogai ....chunnu ne mar k choo choo kerna chora tha....

Fehmida Chaudhary

2nd July 2016