Talash....

Mohabat zindagi may sairab ki terha hay jis ko mae nay kahan kahan nahi dhonda...Her atay jatay mausam may, her khushi may, her ghum may, zindagi k her rang may....Laikin ab tak kisi manzil ka suragh milta hay na manzil ka pata....

Kahan kahan nahi dhonda isay may nay...

veranon may bastiyon may

Sehra may khalyanon may

Na phoolon may, Na he khushoon may

Na masjid may Na mandir may

Na asman may Na badal may

Na bajar zameen may na jangle may

Na baton may Na sochon may

Na khayalon may Na khawabon may

Na Ankhon may Na palkon may

Na ansoo may Na muskurahaton may

Kahin bhi to may isay dhond nahi paye hon

Gurd say aat gai gai hain saray mazar meri ankhon may isay dhond dhond ker

Per Manzil ka pata milta he nahi....

Na janay wo kon khush kismat log hotay hain to wafa ki raah per gamzan ho ker apni manzil ko pa laitay hain ...Un ki taqdeer aur tadbeer dono chahat k safar may kamyabhi hasil ker laiti hay...

Janay wo kon si duain hain jinhahin ALLAH ki raah may sharf e qabooliat ka darja mil jata hay...

Janay wo konsi palkain hoti hay jin ki jhalaron per un ankhon k khawab khushi k jugnoo saja daiti hain...Na janay wo kon log hotay hain...Jo Taqdeer ko pyaray hotay hain ....Na janay kon ???

Fehmida Chaudhary

Zindagi PANAY aur KHONAY ka nam hay

Zindagi may panay ka ansar bohat he kam aur khonay ka ansar bohat he ziada hay...Her wo cheiz jis say ap bachna chahain wo bar bar samnay aker khari ho jati hay...aur jo ap pana chahtay ho wo dore say dore hoti jati hay...

Dekha jaye to zindagi bhar hum khud ko behlatay rehtay hain...kabhi kisi cheiz ka lalach day ker aur kabhi kisi cheiz ka ... Zindagi ko jitna bhi behlao...ye us waqt tak nahi behalti jab tak khud iska apna mood na ho...Ye bari moody hay aur sirf aur sirf apnay lihaz say he chalti hay...

Zindagi k paich o tab may beshumar kham hain jinhain hum na tou suljha saktay hain aur na he isay mustakil tore per khatum ker saktay hain...Zindagi may agar dukh durd na hotay to shayad zindagi ik he dhab per chaltay chaltay khud he thakan mehsoos kernay lagti...

Ye dukh k jhatkay hamaray liye aisay electric shocks ki manind hain to kisi mareez ki dobti howi sanson ko bahal kernay k liye diye jatay hain...In electric shocks ki zaroorat aur faiday say kisi tore inkar nahi kia ja sukta....

Per ye tou hay...k .... Ye zindagi bari zalim hay...Jab tak dil mae dharkan hay hum rawan dawan hain

Is dil ko to asolan soli charha daina chaheye...Is k akri dam nikalnay tak ...

hay ik nanhi si cheiz aur per tabbah ker k rukh daita hay...agar ik bar kaboo say bahar ho jaye tou.....

Zindagi ik basti hay ...is basti may khawabon k ghar hain aur in gharon may rehnay walon k pass bohat thoray say he pal hain..in chotay chotay pal'on ko jore ker zindagi bananay may kabhi insan bohat hoslay say kam laita hay aur kabhi kahin jazbon k sath aur kabhi kahin samjhoton k sath..

Jab in bikhray bikray pal'on ko hum kisi ki zindagi ki diary ki sorat may likhtay hain tou un ghamon ko apas may jornay walay samjhoton , jazbon aur hoslon ki taraf kisi ki nazar nahi jati...

Asal may ye jazbay he to asal ZINDAGI hotay hain...

Fehmida Chaudhary

Chahnay say kuch nahi hota....!!!

Chahnay say kia hota hay???

Chahnay say kuch nahi hota...Laikin ye bat kisi bhi chahnay walay ki samajh may nahi a sukti kyoon k her chahnay wala ye he samajhta hay k jo kuch wo chahta hay usay wo sub mil jaye ga

Us k dil o demagh k tamam tar khayalat matloob k gird tawaf kertay rehtay hain...

Aik zamana beet jata hay.....magar.....nateeja phir bhi sifer (zero) nikalta hay...

Chahnay wala kabhi mutma'in nahi ho pata ...aur ...uski bekarari her ghari berhti he chali jati hay... jab k dosri taraf uska matloob garoor o takabur may apni ankhon per siyah patti bandhay bohat dore nikal jata hay...aur...bechara talib ander he ander ghut-ta rehta hay....Phir aik din us k ander ka ye lawa phut parta hay...

Talib aur matloob k darmiyan na-chaki ki ik aisi dewar khari ho jati hay k jis k aik taraf talib hota hay aur dosri taraf matloob...

Matloob to nikal jata hay patli gali say...

aur

Talib apnay la-ilaj marz ki wajah say afsos nak anjam say do-char hota hay...

Aisay may gair iradi tore per hum sub keh uthtay hain k CHAHNAY say kuch nahi hota...

Laikin agar kisi ko chahnay say pehlay he hum apnay RAB say mang lain to kia ajab mojza ho k TALIB ko MATLOOB mil jaye...aur...Kisi ko sirf chahnay say bhi youn kuch na ho...

Aksar...

Aksar chamaktay chand ko dekh ker ye khayal at hay k itni bulandi per hotay howay itna roshan itna khobsurat hotay howay bhi usko khud per garoor nahi..

Apnay ap ko faramosh ker k dosron ko roshni ponchanay wala chand...

Bhatkay howay ko roshni day ker unhain rasta dekhanay wala chand...

Kaisay nasl e insani k sath chup chap achay pay achay kiye chala jaraha hay...

bagair kisi silay k ...

bagair kisi tawakoh k ...

Aik ham hain NA HONAY per bhi kuch honay ka guman rehta hay...

Mae chand jaisi to nahi ban sakti per mera dil kerta hay k mae ik aisa DIA he ban jaon jo kisi ko manzil tak poncha day...kisi ko andhairay say nijat dila day...Kisi ko wo khushi day don jo meray ikhtiar may ho...per meray ikhtiar may to kuch bhi nahi....chahnay say kia hota hay...kuch bhi nahi...

Sochtay kia tha ..

Hota kia hay...

Apnay bas may kuch nahi hota...

MERAY HATH KHALI THAY...

MERAY HATH KHALI HAIN...

Fehmida Chaudhary

Aisa kabhi na karna...

Zindagi may do tarah k log hotay hain..

Aik wo jo zindagi bhar choat khatay hain , ghum uthatay hain aur uska badla dosron say nikaltay hain, un k sath wo sub kuch ker k jo un per khud beet chuka hota hay ..

Dosray wo log jo zindagi ki her muskil ko hans ker aur apnay ALLAH ki azmaish samajh ker usper pora bhi utartay hain aur koshish kertay hain k un per jo beet chuki hay us say dosron ko bacha sakain aur aik deep jala sakain jis ki roshni sy dosron ko faida ponchay...

Laikin amomun zindagi may aisa nahi hota ..

Baz dafa Zindagi k qaid khanay may kisi chotay say rozan say ati howi koi choti si khushi ki kiran bhi aap kisi say chein laitay ho..sirf aur sirf apnay enjoyment aur so called FUN k chakkar may...

Ye sochay samjhay bagair k aap nay kisi say uski wahid aur choti si khushi bhi chein li...aur ap ko khud is bat ka ahsas tak nahi hota...

Apna ahsas to sub he keray hain..bat to tab hay na k ap apnay samnay walay ka bhi wohi ahsas karo jaisa k ap apna kartay ho....

Duniya may her tarah k log hotay hain..per her insan k ahsasat , kirdar ,andaz aik say nahi hotay...Aur na he iska koi formula ya measurement ki machine ijad howi hay jis say her insan ka behaviour, character ya qualtities ko check kia ja sakay...Na he aisa kisi tore mumkin hay....

Zindagi may kabhi kisi ki di gai dua ko na tukrao k tumhain kiski zaroorat nahi hay..Kia pata tumhari kitni he mushkilat is aik shakhs ki di gai dua say eh solve ho rahi hon...

Zindagi may jab hum kisi k sath bura kertay nahi sharmatay to us buray kiye howay per pashaiman honay per kyoon ghabratay hain...

Insan asraf ul makhloqat hay per farishta hergiz nahi...Koi bhi shaksh khobiyon ka mamba nahi hota...Jahan achaiyan hon wahan kuch buraiyan bhi hoti hain...bat nazar shanasi ki hay...Jin k apnay dil o demagh aur rooh achi ho unhain sub acha he dikhta hay...

Aur jo log dosron may khamiyan talash kertay hain wo dara sul apna app dosron may talash ker rahay hotay hain...

Sub say pehlay apni zaat ki tameer honi chaheye dosron ki bari to bohat baad may ati hay...

Allah hum subko aisa kernay sochnay aur amal kernay ki taufeeq ata farmaye ameen sum ameen

Fehmida Chaudhary

Na-Umeedi...

Jeevan ki is raah guzer per ajj kadam larkaranay lagay hain..Umeed ki koi kiran nazar nahi ati...Janay kyoon bar bar zindagi azmanay chali ati hay...Hamaray daman may to kuch bhi nahi hay phir bhi azmaishain muqadar banti jarahi hain...Hum na to sahib e jamal hain aur na he sahib e kamal hain jo in azmaishon k pul e sirat per sabit kadam reh sakain..bar bar gir ker sambhalna ...bar bar chote khana...bar bar uljh ker sulajna ... kabhi khud he mulzim banna ..kabhi khud he munsif banna...

Zindagi ki aksar ratain in sochon may guzarti hain k akhir aisa kab tak chalay ga...Ye jo khizan jaisa mausam a k teher gaya hay...Ye waqti hay k musalsal rahay ga....aisa he kuch fazool say sawalat dil o demagh may kulbulatay rehtay hain...Agar koi manzil ho ya usay panay ki justujo ho to dil kisi na kisi sorat abla pai ka ye safar teh ker he laita hay...Umeed k chamaktay sitaray na sahi...jugno he zindagi k safar may humsafar ho jain to shayad zindagi ka ye safar kuch had tak sehal ho jaye...

Janay ye zindagi is more per ab kia chahnay lagi hay... waqt ki mutthi say zeest k sehra ki rait phisal rahi hay...zindagi her nai din k sath kam say kam ter hoti jarahi hay....moat kareeb say kareeb ter...

Ab to dil aur daman dono may he koi gunjaish nahi bachi...Magar jeena to hay he na...jab tak sansain chal rahi hain...Aur kuch nahi to Ghum e dil to apna hay he sath hamaray... Ye to sath chornay wala nahi ...zindagi may bhi sath nibhaye ga aur qabr may bhi sath jaye ga...wafadari karay ga ...

Tou phir kyoon hay ye na umeedi k saye..

Kyoon hay duniya say shikway shikayat ..

Fehmida Chaudhary