Akhri manzil........

Ajj janay kesay afratafri ka sa aalam tha...meray veran sehan main dor dor tak ser he ser nazar arahay thay...aik azdaham sa tha logon ka kuch janay pehchanay aur kuch anjan....phir kuch aurton nay mujhay gusal dia aur safaid naya buraq jora zaib tan ker dia...main jaisay khud ko bohat halka sa feel ker rahi thi..lakh bolnay ki koshish kerti per muh say kuch ada he nahi ho paraha tha...sunta sub tha...koi meri badgoi ker rha tha tou koi tareef...aik alag sa he sama tha....main bas aik taraf aik naye bed numa bister per ankhain monday leti thi....phir janay kia howa her taraf shor sa mach gaya...samajh main kuch aisay he araha tha...log keh rahay thay k ab is k janay ka time agaya hay...isko rukhsat karo....phir dekhte he dekhte mujhay doli numa cheiz per char kandon par char logon nay utha lia....main hairan thi...ye kia ajab manzar hay....kia kahani hay....phir wo mujhay le k chaltay rahay chaltay rahay....aur akhir mujhay le ker Shehr e khamoshan pohanch gaye...tab ja k meri samajh main aye k main ajj maar gai hon...roohani moat tou bohat pehlay he hogai thi meri...per ajj jism ko bhi is duniya say rehai mil gai hay..tab main nay jana k ajj meri itni pazeerai kyoon ho rahi thi..mujhko pairon talay rondnay walay log mujhay apnay kandon per utha k laye thay...jo muh mor k guzar jatay thay unhon nay mujhay kafan pehnaye thay....kitni izzat ki hamil ho gai thi main achanak he...
Ajab sa he saroor mehsoos horaha tha mujhay is pazeerai per...room room khushi say jaisay raqs ker raha tha....dil main aik tamana si jagi.k main pehlay kyoon na mar gaye k itni pazeerai ki haqdar bohat pehlay he ho jati........hairan kyoon ho rahay hain app...kia murda log tamanaon say aari hotay hain ... nahi na...wo tou un tamanaon k saath dafan hotay hain jo unki pori nahi hoti...

Haan ajj main mari nahi hon....Ajj shayad main jee gai hon...Ajj mere murda wajood main jeenay ki kasak karwat le rahi hay....per ab kuch nahi ho sakta...k.....bohat dair ho chuki hay....bohat he ziada dair.....


Fehmida Chaudhary
13th July 2013

Mujhay log "Guriya" kehte hain...aur samajhte bhi hain...

Mujhay log guriya kehte hain...dikhnay main mera wajood lamba chora aur mera nanha sa dil ik masoom chirya ki manind..tharakta howa ..pherparata howa...bilkul patjhar main jharay howay un zard paton ki manind jo bedool ho k idher say udhar haalat k jhaker say derbadar bhataktay phirta hay.. main ik khanderzada wajood jahan haalat k jaalay ja baja lagay howay hain,,,In may makeryon ki sorat wo rishtay hain jinhon nay jab bhi la'ab nikala zehrila he nikala....

Main wo waqt ki maari aurat jo chader aur char divari ki shaidai aur waqt nay mujhay kahan kahan ki khaak na chunwai....Wo divar jo seelan zada thi ....gira di main nay...Wo thi bhi bohat he bodi si.....Jis say mujhay jhoot, faraib,raya kari aur makaari ki boo ati thi....

Kaisay kaisay luti hon main....Kesay kesay aur kin kin rishton say thokarain khai hain main nay...kis kis nay chehron pay naqaab laga k daasa hay mujhay......aur mujh main zeher bhar dia hay....Shayad in ragon main khoon ki jaga zeher dorta hay....Kabhi jism k dooran e khoon  k saath mera room room pyar ki laae per tharakta tha...Aur...bas nafrat he nafrat hay charon taraf.....

Aur ab to sub say bara sach yehi hay k wo jo kabhi tamanah thi k koi is dhund ko hata day aur manzar ko wazeh ker day ....Ab wo hasrat .....Zeraah baraber rahi bhi nahi.......Dil ki silait saaf o shafaf hay....kisi chiknay gharay ki terha...

Fehmida Chaudhary
10th July 2013

Alerts........

Hazrat Ali ka farman perh rahi thi k agar koi apni zaroorat k waqt tumhe yaad karay tou ye Allah ki tum per nazr e karam hay k usne kisi ki zarooraton ko pora kernay k liye waseela banaya...

Zindagi main koi bhi shaks perfect tou nahi hota ... main bhi nahi hon...

Jin logon k dil main dosron k liye reham nahi hota wo Allah say apnay liye kesay aur kyoon rehem ki umeed kerte hain...

wo jinko zindagi k badtareen dore main main nay yaad kia unhon nay lafzoon k teer chalaye aur jhatak dia...apnay ghar main bhi hain mujh si....per koi nahi......

wo mujh say meray rishtay ka haq ada ker rahay hain...ALERTS laga ker....yahan main ik dil ka nasore alfaz ki sorat likhon udher wo usay online bethay perh pain...Internet ki duniya hay...Modern way hay her chese ka ...

per mujhay sabr hay is bat ka k

mera sokha halq hay tou geelay halq walay jitna pee lain piyas kam nahi hogi...
mera din bhar main aik ya do sokha niwala hay tou char baar kha ker bhi bhook unki kam nahi hogi...
ajj mujh per ye waqt hay tou kal kisi aur ki baari...
ajj main dukh main hon tou kal kisi aur ki baari...
ye tou zindagi ka asool hay AJJ meri tou Kal teri baari...

Kisi per mat hanso k Rab nay mana kia hay....k usko jalal ajaye k wo tumko us k haal main mubtila ker k usay us haal say azad ker day...

Dilon main jaga bananay ka ik saleeqa hay ik tareeqa hay....jaan marni perti hay...apnay ap ko peesna perta hay...dosray ko apnay say berh ker samajna perta hay...khoon paseena aik kerna perta hay tab ja k kahin baat banti hay...

Do logon ko jhoot bol ker laraiyan kerwa k ap nay jaga banai tou kia kamal kia....?  agar jaan sako tou ye bata don tum logon ko ye....ye sirf tum logon nay apni jaan per wabaal kia hay...

Wo jo Maula hay na ....wo tou evidence nahi mangta kabhi bhi ,,,,documentary tou kisi bhi sorat nahi...kyoon k us k pass tou video hay sub ki aik aik junbish ki ....aik aik amal ki....

Ajj luti bethi hon tou kia...wo kahin tou cover karay ga na...kahin tou un amalon ki jaza day ga jo her munafiqat say paak thi....k amal ka daro madar niyaaton per hay....

Fehmida Chaudhary
5th July 2013